Iha!

No er prosjektbeskrivinga mi til eksamen godkjent og klar. Det er berre å hiva seg i gong med mekking av sider, portfolie og reklamefilm. Huhei! Eg har i beskrivinga mi lagt vekt på at eg vil ha ei innovativ side som illustrerer kven Hildring er – altså mi eiga verksemd, og kva som vert tilbydd. Håpar eg klarar å strippa nettstaden for irrelevante ting, noko som kanskje har vore ein av mine utfordringar som designstudent. Eg legg til element som ikkje har noko grunn for å vera der, og då vert det …rotete… og irrelevant.

Har nokre sider som er mine hovudinspirasjonar både når det gjeld utforming og innhald, stay tuned. Her er interessante saker på g.

Men først lyt eg gjera mappa ferdig. Har enno ikkje laga banneret som skal lenka til denne bloggen, men trur eg veit korleis eg vil ha det, og då går det fort. Og eg har jo enno ti dagar på meg… (jikes!)

Elles har det jo skjedd trivlege saker i livet, mellom anna er puseillustrasjonen min «Lykke til» valt ut som eitt av bidraga i Den store kortsamlinga 2012, som eg skreiv om her. Artig å spre sine illustrasjonar litt rundt om kysten! Meir av det!

Og so har eg ein spanande brief på onsdag, der eg kanskje får ein superspanande jobb for ein kjempeartig kunde, og eventuelt skal arbeidet mitt visast til kjempemange menneske, så dette er ein eg vil satsa på! Håpar dei tenkjer det same om meg… !

Og so skal eg laga eit banner som skal henga ute i Rosendal og reklamera for den komande Apejungelen (del av RIFparken, som eg har laga logo til). det vert kjekt å sjå mine greier pryda nærmiljøet 😉

Og so skal filmen eg laga om Gravdal Skipsbyggeri visast på rorbu-kveld på Sunde til helga, i regi Sunde Kyst- og Litteratursenter. Dei skal ha dugnadsfest og filmen min er ein del av underhaldninga. Stas. Det ballar på seg!

Ting skjer. Eg tykkjer det er fett. Feirar livet med eit bilete frå himmelen over Beograd.

 

Banner til oblig 08

Ei av oppgåvene som skal løysast til oblig 08 er å laga eit banner til flashgalleriet som skal integrerast i oblig 06 – enkel nettstad (fotogalleriet inneheld fotoessayet frå oblig 07).

Eit banner er ei lenke – ei slags annonse – for å reklamera for ei ekstern nettside. Eg spelar her vidare på mine runde former, og har nytta eit utsnitt av eitt av bileta i essayet som motiv. Då gir eg ein smakebit som forhåpentlegvis vekker interesse, og gjer at folk ønskjer å sjå meir. Fanga merksemd er vel heile vitsen med eit banner?!

Eg har nytta fonten Haettenschweiler i banneret – ein font eg tykkjer har litt edge, samstundes som den er tydeleg, leiken og er godt lesbar. Stilmessig passar den då inn til fotoessayet mitt, og med litt planlagte justeringar på min enkle nettstad, vil den gli greit inn der og. Stjernene har eg putta på for litt meir edge, samt ein kontrast til elipsane.

Her er den.